Nov 24, 2021 • 5M

ക്ലൈമറ്റ് ചെയ്ഞ്ച്, ഭാഗം 2; നാം ഓരോരുത്തരും അറിഞ്ഞിരിക്കണം ഇക്കാര്യങ്ങള്‍

കുട്ടികള്‍ മുതല്‍ മുതിര്‍ന്നവര്‍ വരെ ഓരോ മനുഷ്യനും ഇതിനെ കുറിച്ച് ധാരണയുണ്ടായിരിക്കണം

3
 
1.0×
0:00
-5:21
Open in playerListen on);
Episode details
Comments

Summary

കാലാവസ്ഥാ വ്യതിയാനവുമായി ബന്ധപ്പെട്ട അടിസ്ഥാനപരമായ കാര്യങ്ങള്‍ കഴിഞ്ഞ ഭാഗങ്ങളില്‍ നാം ചര്‍ച്ച ചെയ്തു. ഇനി ഇതുമായി ബന്ധപ്പെട്ട് നാം ഓരോരുത്തരും അറിഞ്ഞിരിക്കേണ്ട ചില പദങ്ങളാണ് ഈ ഭാഗത്തില്‍ വിശദമാക്കുന്നത്. കുട്ടികള്‍ മുതല്‍ മുതിര്‍ന്നവര്‍ വരെ ഓരോ മനുഷ്യനും ഇതിനെ കുറിച്ച് ധാരണയുണ്ടായിരിക്കണം

ആഗോള താപനം (ഗ്ലോബല്‍ വാമിംഗ്): കാര്‍ബണ്‍ ഡയോക്സൈഡ്, മീഥൈന്‍ തുടങ്ങിയ അന്തരീക്ഷ മാലിന്യങ്ങളുടെ വര്‍ധന മൂലമുള്ള ഹരിതഗൃഹ പ്രഭാവം കാരണം ഭൂമിയുടെ അന്തരീക്ഷത്തിന്റെ ശരാശരി താപനില വര്‍ധിക്കുന്നതിനെയാണ് ആഗോള താപനം എന്ന് വിളിക്കുന്നത്.

എന്താണ് കാലാവസ്ഥാ വ്യതിയാനം അഥവാ ക്ലൈമറ്റ് ചേഞ്ച്-ഭാഗം 2





കാലാവസ്ഥ വ്യതിയാനം (ക്ലൈമറ്റ് ചെയ്ഞ്ച്): അന്തരീക്ഷത്തിലെ ഹരിതഗൃഹ വാതകങ്ങളുടെ തോതിലുള്ള വര്‍ധന മൂലം പ്രാദേശിക, ആഗോള കാലാവസ്ഥകളിലുണ്ടാകുന്ന മാറ്റത്തെയാണ് കാലാവസ്ഥ വ്യതിയാനം എന്ന് വിളിക്കുന്നത്. ഫോസില്‍ ഇന്ധനങ്ങളുടെ അമിതമായ ഉപയോഗം കാരണം വ്യാവസായിക വിപ്ലവത്തിന് ശേഷമാണ് കാലാവസ്ഥ വ്യതിയാനം രൂക്ഷമായത്.

ഹരിതഗൃഹ വാതകങ്ങള്‍ (ഗ്രീന്‍ഹൗസ് ഗ്യാസ്): കാര്‍ബണ്‍ ഡയോക്സൈഡ്, മീഥെയ്ന്‍ പോലുള്ള കാര്‍ബണ്‍ അധിഷ്ഠിത വാതകങ്ങളും ഹരിതഗൃഹ വാതകങ്ങളില്‍ ഉള്‍പ്പെടുന്നു. സൂര്യന്റെ ചൂട് നിലനിര്‍ത്താന്‍ സഹായിക്കുമെന്നതിനാല്‍ അന്തരീക്ഷത്തില്‍ നിശ്ചിത അളവില്‍ ഇവ ആവശ്യമാണ്. ഈ വാതകങ്ങള്‍ ഉള്ളതിനാലാണ് ഭൂമിയില്‍ ജീവിവര്‍ഗ്ഗത്തിന്റെ നിലനില്‍പ്പ് സാധ്യമാകുന്നത്. ഇവ ഇല്ലെങ്കില്‍ ഭൂമി തണുത്തുറഞ്ഞ അവസ്ഥയിലായിരിക്കും. എന്നാല്‍ വ്യാവസായിക ആവശ്യങ്ങള്‍ക്കും ഗതാഗതത്തിനും ഗാര്‍ഹിക ആവശ്യങ്ങള്‍ക്കും ഫോസില്‍ ഇന്ധനങ്ങള്‍ അധികമായി ഉപയോഗിച്ച് തുടങ്ങിയതോടെ അന്തരീക്ഷത്തിലേക്ക് ഹരിതഗൃഹ വാതകങ്ങള്‍ അമിതമായി എത്തിത്തുടങ്ങി. ഇത് ആഗോളതാപനത്തിലേക്ക് നയിച്ചു.

ഹരിതഗൃഹ പ്രഭാവം (ഗ്രീന്‍ഹൗസ് ഇഫക്റ്റ്): അമിതമായ ഹരിതഗൃഹ പ്രഭാവത്തിന്റെ പ്രതിഫലനമാണ് ഇപ്പോഴത്തെ ആഗോള താപനം. അന്തരീക്ഷത്തിലെ ജലകണങ്ങള്‍, കാര്‍ബണ്‍ ഡയോക്സൈഡ്, മീഥൈന്‍, നൈട്രസ് ഓക്സൈഡുകള്‍ മറ്റ് ഹരിതഗൃഹ വാതകങ്ങള്‍ എന്നിവയുടെ സാന്നിധ്യം മൂലം ഭൂമിയുടെ ഉപരിതലവും അന്തരീക്ഷത്തിന്റെ താഴെത്തട്ടും ചൂട് പിടിക്കുന്നതിനെയാണ് ഹരിതഗൃഹ പ്രഭാവം എന്ന് വിളിക്കുന്നത്. 2014ലെ ഐപിസിസി റിപ്പോര്‍ട്ടില്‍, നിലവില്‍ അന്തരീക്ഷത്തിലുള്ള കാര്‍ബണ്‍ ഡയോക്സൈഡ്, മീഥൈന്‍, നൈട്രസ് ഓക്സൈഡ് എന്നീ ഹരിതഗൃഹ വാതകങ്ങളുടെ തോത് ഹിമാനികളില്‍ നിന്നും വേര്‍തിരിച്ചെടുത്ത 800,000 വര്‍ഷം പഴക്കമുള്ള ഐസ് കോറുകളില്‍ കണ്ടെത്തിയ ഇവയുടെ തോതിനെ കടത്തിവെട്ടിയതായി പറയുന്നു. മറ്റൊരു കാലഘട്ടത്തിലെ അന്തരീക്ഷ താപനിലയെയും വായുവിന്റെ രാസഘടനയെയും കുറിച്ച് സൂചനകള്‍ നല്‍കുന്ന ഹിമപാളികളാണ് ഐസ് കോറുകള്‍. ഐസ് കോറിംഗിലൂടെയാണ് ശാസ്ത്രജ്ഞര്‍ പുരാതന കാലത്തെ അന്തരീക്ഷത്തെ കുറിച്ച് മനസിലാക്കുന്നത്.

കാര്‍ബണ്‍ ചക്രം (കാര്‍ബണ്‍ സൈക്കിള്‍): കാര്‍ബണ്‍ വാതകങ്ങളുടെ പുറന്തള്ളലും ആഗിരണവും ഉള്‍പ്പെട്ട സ്വാഭാവിക പ്രക്രിയയാണ് കാര്‍ബണ്‍ ചക്രം. അന്തരീകഷത്തിലെ കാര്‍ബണ്‍ വാതകങ്ങളുടെ മൊത്തത്തിലുള്ള തോത് നിശ്ചയിക്കപ്പെടുന്നത് കാര്‍ബണ്‍ ചക്രത്തിലൂടെയാണ്. ഭൂമിയില്‍ ജീവന്റെ നിലനില്‍പ്പിന് കാര്‍ബണ്‍ ഡയോക്സൈഡ് അത്യന്താപേക്ഷിതമാണ്. സസ്യങ്ങളുടെ വളര്‍ച്ചയ്ക്ക് കാര്‍ബണ്‍ ഡയോക്സൈഡ് കൂടിയേ തീരൂ. ഹരിതഗൃഹ പ്രഭാവത്തിലും മനുഷ്യ സമ്പദ് ഘടനയിലും വഹിക്കുന്ന സുപ്രധാന പങ്ക് കാര്‍ബണ്‍ ഡയോക്സൈഡിനെ ഹരിതഗൃഹ വാതകങ്ങളില്‍ പ്രധാനിയാക്കുന്നു. പതിനെട്ടാം നൂറ്റാണ്ടിന്റെ മധ്യത്തില്‍, വ്യാവസായിക യുഗത്തിന്റെ ആരംഭത്തോടെ അന്തരീക്ഷത്തിലെ കാര്‍ബണ്‍ ഡയോക്സൈഡിന്റെ തോത് ഏകദേശം 280 പിപിഎം (പാര്‍ട്സ് പെര്‍ മില്യണ്‍) ആയെന്നാണ് അനുമാനം. 2018 പകുതിയോടെ ഇത് 406 പിപിഎം ആയി. ലോകത്ത് ഫോസില്‍ ഇന്ധനങ്ങളുടെ ഉപയോഗം ഇതേ രീതിയില്‍ തുടര്‍ന്നാല്‍, 21ാം നൂറ്റാണ്ടിന്റെ പകുതിയോടെ അന്തരീക്ഷത്തിലെ കാര്‍ബണ്‍ ഡയോക്സൈഡിന്റെ തോത് 550 പിപിഎം ആകും. അതായത് 300 വര്‍ഷങ്ങളുടെ ഇടവേളയില്‍ അന്തരീക്ഷത്തിലെ കാര്‍ബണ്‍ ഡയോക്സൈഡിന്റെ ഇരട്ടിയാകുന്ന സ്ഥിതിയുണ്ടാകും.

അസാധാരണ രീതിയിലുള്ള കാലാവസ്ഥ വ്യതിയാനമാണ് ഇന്നത്തെ ആഗോളതാപനം. ജനങ്ങള്‍ തിങ്ങിപ്പാര്‍ക്കുന്ന തീരപ്രദേശങ്ങളില്‍ ജലനിരപ്പ് ഉയരുന്നതും ലോകമെമ്പാടുമുള്ള പര്‍വ്വതങ്ങളില്‍ ഹിമാനികള്‍ ഉരുകുന്നതും നമ്മുടെ കാലാവസ്ഥയില്‍ അതുണ്ടാക്കുന്ന രൂക്ഷമായ പ്രത്യാഘാതങ്ങള്‍ മൂലമാണ്. താപനില വര്‍ധനയ്ക്ക് പുറമേ, അതിന്റെ ഭീകരമായ പാര്‍ശ്വഫലങ്ങളും ഭൂമിയില്‍ ജീവജാലങ്ങളുടെ നിലനില്‍പ്പിന് ആപത്താണ്.